- Kirchenkreis
- Gemeinden
- Kindergärten
- Gemeinsame Dienste
- Kirchenkreisstiftung
- Glauben leben
Evangelischer Kirchenkreis Lübbecke
Haalftiet (Halbzeit)
Worümme heit’t de Johannisbeeren Johannisbeeren? Niu, dat hang mit Johannes den Dörper, van den us de Bibel vetellt, teohaupe. Schon in’n 5. Joahrhunnert wurd sien Geburts- un Gedenkdagg up den 24. Juni faaste leggt. Züh, un weil düsse lütken rauten, witten orre schwaarten Beeren ümme den 24. Juni rümme riep sind, werd sei Johannisbeeren nömmt.
Johannes de Dörper lierbere an de Grenze van den Aulen un Naaien Testament os Prophet, Prediger, Dörper un Märtyrer. Siene Upgoabe was et, den Weg van Jesus trechte teo moaken. Hei wiesere up Jesus os den Christus, den Heiland un Retter van iuse Welt hen. Johannes was sick siener grauten Upgoabe bewusst. Trotzdem stäagg öhne dat nich teo Koppe. Hei was dür un dür bescheiden, en Diener in iusen Herrgott sien’n Ploan eben. Teo siene Schoilers seer Johannes in Joh. 3,30 os Henwies up sien Bedühen: „Hei (Jesus) mott wassen, eck mott afniehrm.“
Den Geburtsdagg van Johannes den Dörper, sess Monate vür de Geburt van Jesus (Heiligoabend) teo leggen, gäaht up eine Bemerkung iut de Bibel trügge (Lukas 1,36). Doadür es Halftiet (Halbzeit) tüsken Wiehnachen un Wiehnachen. Man küet auck van Wiehnachen in de Sommertiet. Schließlick goahr wi niu wiehe up en naaiet Wiehnachen teo.
Oabe de Nöachte van den 24. Juni, den Johannesdagg, teo de Sommersonnenwende es auck nau en anneret grautet Symbol. Et ünnerstrick dat Bibelwoort „Hei mott wassen, eck mott afniehrm.“ Dat gellt niu vür us persöhnlick: Sau, wie de Doage niu wiehe körter werd, afniehrmt, sau schall iuse Eigensinn un aule Oart afniehrm. Un in glieker Wiese well Jesus mit sien’n geoen Geist un siene Leifte in iusen Haarte mähr un mähr Platz inniehrm. Wie kann dat angoahn? Nich van us iut. Afniehrm un Teoniehrm es en Geschenk van den Himmel, ümme et mit ein’n Woort van Johannes den Dörper teo säggen (Joh.3,27). Wi künnt oabe doafür open sien. Wi künnt doarümme behen. In den Wiehnachtslied van Carl Emil Wilhelm Quandt „Mit den Hirten will ich gehen“ hett dat teon Enne sau: „Komm, ach komm ins Herz hinein, lass es deine Krippe sein!“
Doarup konns diu di veloaten: Jesus, os de uperstoahne Herr, lätt sick gerne inloahen, well in us teohiuse sien. Un dat teo gede Joahrestiet. Joa, dat es geoe Noahricht für di un mi.
.jpg)