Worte der Besinnung von Diakon Ewald Kröger

Heute von Ewald Kröger, Diakon i. R., »up Hiller Platt«

Dat plattdütske Woort für »locken« es »tocken«. Dat Heohn tocket siene Küken. De Biuer siene Koihe. Un auk wi Minsken werd tocket. Geot, wenn man tocket werd un nich teo etwas twungen.
Fast Dagg für Dagg kriege wi Werbung in iuse Hüser. Werbung well us auk tocken. Wi häb us, bi us teo Hius, de Moaite (Mühe) moaket, un einmoal de Werbung van eine ganze Wirken sammelt. De grauten Kataloge, de ulle haalbe Joahre kurmt, nich miehe tellt. Et woien teo iuse Vewunnerung 4,31 kg. Dat moaket upt Joahr hen obe den Diumen etwoa 200 kg pro Hiushalt iut, nur de ganz normoale Werbung. Kein Wunner, wenn de grauten Poapiertunnen sietlik upplatzet. Et sind 200 kg bunt bedrucketet Poapier, wat us tocken well teo körpen.
Eine bunte Welt werd us anbohen. Wat teo Eten un teo Drinken, wat teon Anteihn, wat teon Feinmoaken un geot Riuken, Autos, de wat heer moaket, Reisen, de us de wiete Welt wieset, un, un, un.
Glücklicke Minsken mit seligen Gneisen (Lächeln) sind teo seihn. Glücke un Seligkert os Tockmittel. Glücke un Seligkert, de man köapen kann. Sau werd us dat vürspierlt. Och, wenn dat doch blaus sau einfach woie. Joa, wi schütt us mit schlechten Gewierten froagen, wat wi doch für bediuernswerte Minsken sind, wenn wi dat ulles nich häb. Gellt et doch nix teo vepassen un mit annern miehe teo hauln. Un wenn ek dänn dür Werbung in ein’n längerfristigen Vedragg tocket weär, denn bind mi dat un moaket mi afhängig.
Oabe, up mien Glücke un miene Seligkert well de Werbung goarnich up iut. Dat werd us nur vürmoaket. Eigentlik gehrt et ümme mien mähr orre werniger siuer vedeintet Geld, wat man mi iut de Tasken teihn well. Et gehrt ümme dat Geschäft van anneren dür mi.
Bi den Wirkenspruch für ankurm Wirken wer wi auk tocket. In de geoen Noahricht, wi Matthäus de upschriehem häf (Kapitel 11, Verk 29), het et van Jesus, de de Christus es: Kuemt ulle teo mi, de gi geo afploaget un schwoare Last dregen deot: Ek well geo wat Geoes deon.
Sien Tocken es echte un ehrlik. Ek weär tocket un bin meint. Doa gif dat keine Achtergedanken, kein Geschäft, dat hei moaken well. Ek schall nich afhängig wern sondern frei. Wat teo betoahlen was, häf hei längest für mi betoahlt. Mi schall wat schonken wern. Sau einfach es dat. Sien Krütz es dat Teiken, datt et öhne ganz un goar ümme mi gehrt, ümme mien Lierben, mien Glücke un miene Seligekert. Van sau ein’n well ek mi wall tocken loaten un miehe goahn.