- Kirchenkreis
- Gemeinden
- Kindergärten
- Gemeinsame Dienste
- Kirchenkreisstiftung
- Glauben leben
Evangelischer Kirchenkreis Lübbecke
Wofür doch Kloaber ulles geot es
Kloaber es in’n Hiller Platt dat plattdütske Woort für den Klee. Kloaber was en geoet Schwienefeoer. Dat häf mien Vatte früher gümme mit de Saaißen maaihet. Dat Kloaberblatt mit vaaie Bleere häb wi os Kinner oft socht. Dat was selten un scheol angeblich Glücke bringen. Oabe dat noarmoale Kloaberblatt häf man drei Bleere.
Dat Kloaberblatt haar et dehen Minsken in vürchristliche Tiet schon angedoan. Magische un heilsoame Kräfte scheol‘n in’n Kloaber steken. Weck glöaben, datt Kloaberbrei, up de Augen geschmehet, eine vezauberte Feheninsel sichtboar moaken scheol.
Interessant es auk, dat in Irland dat Kloaberblatt tiergen de Harfe teon Nationoalteiken wuen es. Saugoar de irische Fluggesellschaft Aer Lingus häf groin-witte Fliegers un achter an’n Stäat es gümme en grautet groinet Kloaberblatt teo seihn. De Reederei Irish Ferries häf bi siene Schippe groine Schossteine (Schornsteine) un doarup en wittet Kloaberblatt. Worümme eigentlick?
Niu, dat hang mit dehen Missionoar St. Patrick teohaupe. Dat es de Nationoalheilige van Irland. Doarümme giff dat in düssen Lanne gedet Joahr den St. Patrick’s Fierdagg. Dänn es in Irland ulles groin antogen un schmücket, groin, wie de Kloaber.
De heilige Patrick haar in Irland os Missionoar nich gümme en geoen Stand. Sippenführer moaken sick obe sien’n Gott lustig, de iut Vatte, Sohn un Heiligen Geist bestoahn scheol. Für de was dat wie en Monster mit drei Köppen. Un teogegierm, dat mit de Drefaltigkäat (Dreieinigkeit orre Trinität) es joa auk nich einfach teo vestoahn. Oabe de Missionoar Patrick häf an dehen groinen Kloaberblatt mit siene drei Bleere de Dreifaltigkäat van iusen Herrgott kloar moaket. Un dat häf de Sippenführer mit öhre Femilgen obetüget. Sau es obe den Kloaber Irland christlick wuen. Woteo doch Kloaber ulles geot es!
Mooen, Sönndagg, fiehe wi in iusen Kerken de Dreifaltigkäat. Doarümme hett de Sönndagg auk Trinitatis. De Apostel Paulus veabschiedet sick in sien‘n zweiden Breif an de Christen in Korinth mit den Wöhen: „De Gnoade van Jesus Christus, de Leifte van iusen Herrgott un de Gemeinschaft, de de Heilige Geist giff, schall mit ullen sien.“ (2. Korinther 13,13) Et es de Wierkenspruch für ankuem Wierken. De dreifaltige Gott werd doaahne beschriehem. Gnoade, Leifte un Gemeinschaft briuke wi in iusen Lierben, wie Eten un Drinken. Dat ulles giff us de Gott ümmesüss, de sick up dreierlei Wiese us vürstellt häf. Sau geot es hei teo us.
Kiek, un wenn diu up de Nesen liggs un meins, diu mösses in‘t Gress (Gras) bieten, denn kiek di ümme. Velichte finds diu tüsken ullen Greese nau en Kloaberblatt, dat di an dehen dreieinigen Gott mit siene Gnoade un Leifte erinnert. Diu draffs wierten, diu bis in diene Naut nich ulläane. Hei helpet di.
