- Kirchenkreis
- Gemeinden
- Kindergärten
- Gemeinsame Dienste
- Kirchenkreisstiftung
- Glauben leben
Evangelischer Kirchenkreis Lübbecke
Singen iut geoen Grund
Singen häf in iuse Femilge un in mien’n Lierben gümme ne graute Rulle spierlt. Os eck mit mien’n Wiebe den Biuernhoff van mien’n Breoer uplösen mösse, gehöare teo dehen Noahloat auck ne ganz Riege van aulen Gesangboikern iut veschiedenen Tiehen doateo. Obwohl man os lütke, oarme Keohbiuer nich vierl Geld haar, wurd doch Wert doarup leggt, datt tiergen de Bibel gümme aktuelle Gesangboiker für den Kerkgang teo Hand woien.
Teo Wiehnachen was es schon für mi os lütke Junge wat Besonners, wenn an den Wiehnachtsbaum mit lüchende Talglechte sungen wurd. Auck dänn, wenn wi bi Unkels un Tanten up Besuch woien, gehöare in de Wiehnachtstiet dat Singen an ‘n Oabend doateo. Os Kiend haar eck ne Freundin in de Noaberskopp. Dat könne schon Zieharmonika spierl‘n. Oft häb wi in’n Sommer ünnern Kestangenbaum seten un häb stundenlang Lieder, de us bekannt woien, sungen. Doabi häb wi de ganzen Gegend bi us ünnerhaul’n.
Noarheer in’n CVJM spierle dat Singen teo Gitarren ne graute Rulle. Doa häbbe eck dänn dat auck dat Gitarrespierl‘n läat. Joa, wi häb daumoals schon ne lütke Band upmoaket, os dat inne Kerken nau keine Meode was. Denn wurd eck Diakon un Jugendreferent. Bi ulle Veanstaltungen gehöare miene Gitarre doateo, un et wurd sungen. Ulläane 25 Joahre haar eck mit TEN SING teo deon, dat hett: Teenager singen. Un niu in de lesten Joahre singe eck mit mien’n Wiebe bi Plattdütsk in de Kerken vierl up Platt. Auck dat gäaht geot. De Grund für iuse Singen os Christen es in de Bibel teo fien’n. Dat Singen tüht sick van Anfang bet Enne dür. Schon Mose häf mit den Israeliten iusen Herrgott en Loblied sungen, os de Flucht iut Ägypten dür siene Hülpe glücket was. Denket nur an de vierlen Psalmen, dat Liederbeok iut den Aulen Testamente. Iut den Naaien Testamente sind de Lobgesänge van Maria, Zacharias un Simeon ganz bekannt. De Missionoare Paulus un Silas schütt ganz helle Loblieder in’n Gefängnis sungen häm’m. Un in’n lesten Beok van de Bibel singet an’n Enne van de Welt de, de nich vür ulle Gottlausigkäat in de Knaaie goahn sind, Lieder, de de Grötte, Herrlichkäat, Gerechtigkäat, Woahrhaftigkäat un Heiligkäat van iusen Herrgott besinget (Apostelgeschichte 15, 2-4, Predigttext Kantatesonntag 2024). Bet Himmelfoahrt sind wi nau in de Austertiet. An ein‘n Sönndag in düsse Austertiet es dat Singen dat Thema. Doarümme häf de Sönndagg - mooen - den Noamen Kantate. Et es de latienske Anfang van Psalm 98 1a. Doa hett dat up Hauchdütsk: Singet dem Herrn ein neues Lied!
Schlimm gäaht dat in düsse Welt teo, auck in iuse Doage. Dat moaket us Angest. Oabe os Christen seiht wi nau ne annere Wirklichkäat. Seid Austern sind dür Jesus Sünne, Daut un Dübel besieget. Dat es iuse Hopen, iuse Traust. Wenn dat nich Grund teon Singen es, auck naaie Lieder, bi gede Gelegenhäat, sümms nau an de Greber. Joa, Singen spierlt für us Christen gümme ne ganz graute Rulle. Singe doch mit! Wi häb geoen Grund doateo!
.jpg)