- Kirchenkreis
- Gemeinden
- Kindergärten
- Gemeinsame Dienste
- Kirchenkreisstiftung
- Glauben leben
Evangelischer Kirchenkreis Lübbecke
Identifikation van höachste Stiehe
Os Obeklasse van de Diakonenscheole Nazareth in Bethel moaken wi ne Studienfoahrt teo ne annern Diakonenscheole in Dänemoark. Iut Spoaß haan wi ne aule Foahne van iusen Diakonischen Gemeinschaft Nazareth miehe nohm. Dat was en wittet Johanniterkrüüs up rohen Grund. Sei höng bi de langen Foahrt sichtboar an eine Schieben van dehen Autobus.
Niu es bekannt, datt Dänen vierl van Flaggen un Wimpel hault. Gedeeine, de up sick un sien Land wat hult, häf sau’n Masten mit Wimpel orre Fahne in Goaen stoahn. Sau was dat auk bi de Diakonenscheole. Geden Mohen mösse einer van de Studierenden de dänske Flagge hissen.
Eines Doages häb wi iut Spoaß un Freundschaftsgedanken van den Studierenden, de Dienst haar, iuse Foahne ünner de dänsken Flagge hangen loaten. Van’n Anseihn moaken sick bäade geot. Bäade haan doch de Foarben raut un witt. Oabe denn kamm prompt en Telefonat van de Hiusleitunge: Wat dat denn wall scheol? Man foilde sick in siene dänsken Ehre beleidigt. Saubutz mösse iuse schöne aule Foahne wiehe rünner hoalt wern. Wi häb dat os Dütske nich vestoahn un häb us froaget, wie graut wall de Eerger wesen woie, wenn wi ne Ünnerböcksen ünner de dänsken Flagge hongen häan?
Düsse Begierbenhäat moaket düütlick, wi dull sick de Dänen bet vendoage mit öhre Flagge, un doamiehe mit öhen Land, vebiun‘ seiht. Man nennt dat wall Identifikation. Wer de Flagge nich ernst nimmp orre goar beleidigt, de vegripp sick an Land un Lühe. Wer de Flagge un den Kult, de doamiehe vebiun‘ es, achet, de achet un ehrt dat Land un siene Minsken. De Flagge es vierl mähr os en Spoaß.
An düsse Geschichte mösse eck denken, os eck den Wierkenspruch für ankuem‘ Wierken lass. Doa sägg Jesus teo siene Jüngers in Lukas 10,16a: „Wer up geo lustert, de lustert up mi. Un wer geo nich iutstoahn kann, de kann mi nich iutstoahn.“ Wat es dat doch für en Vetreoen van Jesus in siene Jüngers, datt hei sick mit dehen sau dull indentifiziert! Für de Dänen, un dat gelt für ulle Völker, stäaht de Flagge für en ganzet Land. Gegenobe de Welt stoaht de Christen für Jesus Christus, sägg iuse Wierkenspruch.
Dat es ungeheuerlick, wat Jesus van siene Jüngers behauptet. Dao stroibet sick wat in mi. Weit Jesus nich, wat siene Jüngers für „Donnerschläge“ sien künnt? Bin eck denn sau mit Jesus vebiu’n, datt mien Lierben van Jesus tüget? Identifizier eck mi mit Jesus, datt hei sick mit mi sau butt identifizier‘n kann? - Dat Bibelwoort van Jesus sägg us os Christen nich nur wat teo. Et häf auk en Anspruch an us. Et froaget mi, wat iut mien’n Munne van Jesus teo höan es. Et froaget mi, wat van mien’n Lieben obe Jesus teo lesen es.
